Gin-imbitar si former President Rodrigo Duterte, pila ka mga himata sang ginaalegar biktima sang extrajudicial killings kag 30 ka iban pa ang gin-imbitar nga magtambong sa imbestigasyon sang Senado natuhoy sa controversial anti-narcotics campaigns sang nagligad nga administrasyon.
Ang Senate Blue Ribbon subcommittee, nga iga-preside ni Senator Koko Pimentel, ang natalana nga magpatigayon sang labing una nga hearing sa Oktubre 28.
Magluwas kay Duterte, gin-imbitar man sanday former Sen. Leila de Lima kag iban pa nga key personalities sa drug war kaangay kay former PCSO General Manager retired Police Col. Royina Garma, Former Iloilo City mayor Jed Mabilog, kag ang pamilya sang mga biktima sang EJK.
Si Senator Joel Villanueva, nga magaserbi bilang vice chair sang subcommittee, ang nagpahayag nga ang presensya ni Duterte ang mangin bag-o nga elemento nga sarang ma-introduce sang Senate investigation kag ginphayag nga ang anay Presidente ang pagahatagan sang respeto.
