Nag-umpisa na ang pagpatigayon sang free vaccination sang City Health Office sang ciudad sang Bacolod para sa flu kag pneumonia vaccine.
Sa interview sang Bombo Radyo kay Jam Isidto, Health Education and Promotion Officer sang City Health Office, magluwas sa mga free vaccination sa mga tagsa ka barangay sa ciudad, sila nagdesisyon nga magpatigayon man sang libre nga pagpa-vaccine sa mga mall sa ciudad sa tinutuyo nga matarget ang mga tawo nga nagalagaw kag mapahibalo nga libre ang nasambit nga vaccine.
Ang flu vaccine ang para sa mga naga-edad sang 18 anyos pasaka samtang ang 200 ka pneumonia vaccine naman ang para sa mga naga-edad sang 60 anyos pasaka.
Suno kay Isidto, indi naman required ang ID pero mas maayo kun may dala kag dapat nga yara sa maayo nga kondisyon ang lawas antes magpavaccine.
Sa epekto naman sang vaccine, dapat nga wala sang ikabalaka bangod nga normal lamang nga makabatyag ang gamay nga hilanat nga madala man sa pag-inom sang paracetamol samtang may yara man sang nagpavaccine nga wala man sang may ginbatyag nga paglain sang pamatyag.
Sila nagpatigayon sang free vaccination subong nga adlaw sa Gaisano Central sa Downtown area kag bwas naman sa Robinson mall sa Barangay Mandalagan humalin alas 9:00 sang aga tubtob alas 5:00 sang hapon.
