Lima naman ang nagdugang nga kaso sang COVID-19 sa probinsya sang Negros Occidental sa COVD-19 Case Bulletin No. 99 nga ginpagwa sang Department of Health (DOH) Region 6 kahapon.
Suno kay Dr. Renilyn Reyes, focal person sang DOH Region 6, may nagdugang nga 12 sa mga kaso sang COVID-19 sa Western Visayas nga nagdangat na sa kabug-usan nga 365.
Sa mga panibag-o nga narecord, siyam diri ang asymptomatic samtang tatlo ang naman ang severe cases.
Walo sa mga ini ang locally stranded individuals (LSI) samtang ang nabilin nga apat ang lunsay mga OFW repatriates.
Ang lima ka nagdugang nga kaso sa Negros Occidental nagikan sa test nga ginpatigayon sang Teresita Lopez Jalandoni Provincial Hospital Molecular Laboratory.
Si WV patient 354 ang isa ka 47 anyos nga lalaki, isa ka responder kag residente sa banwa sang Murcia.
Sanday WV patient 355 nga isa ka 64 anyos nga lalaki, WV patient 356 nga isa ka 32 anyos nga lalaki kag 357 nga isa ka 31 anyos nga lalaki ang lunsay mga mangingisda nga may trave history sa Antique kag Zamboanga kag nagpauli sa banwa sang Hinobaan.
Samtang si WV patient 365 naman ang isa ka 33 anyos nga lalaki nga residente sa banwa sang Pontevedra nga isa naman ka repatriated OFW.
Ang mga pasyente ang yara sa karon nakapaidalum sa facility quarantine.
Sa karon, nagdangat na sa 109 ang kabug-usan nga kaso sang COVID-19 sa Negros Occidental samtang nagapabilin naman sa 47 ang sa siyudad sang Bacolod.
Samtang, ginarekomendar sang Department of Health nga ibutang sa quarantine facility ang mga magapositibo sangsa ipaidalum sa home quarantine.
Samtang igalunsyar naman sang DOH ang kampanya nga BIDA, nahanungod sa pagpahibalo sa mga pumuluyo sang tagsa ka social responsibility sa pag-atubang sa COVID-19.
Suno kay Dr. Renilyn Reyes, focal person sang DOH Region 6, ang BIDA ang nagakahulugan sang (B) Bawal ang wala sang facemask, (I) I-sanitize ang kada kamot, (D) Distansya sang at least isa ka metro sa kada isa kag (A) Ang aksyon dapat base sa korek nga impormasyon.
Ini ang ginakabig nga pinakasimple nga pamaagi sang pagpahanumdom bangod madali sauluhon sang mga pumuluyo.
