Patay ang isa ka 29-anyos nga lalaki nga frontliner matapos nga naghikog paagi sa pagtiro sang iya kaugalingon sa Villa Lucasan Capitol Heights, Barangay Mandalagan, ciudad sang Bacolod kahapon.
Ginkilala ang biktima kay Michael Superficial, single kag nagatrabaho bilang isa ka Information Technologist (I.T.) sang Corazon Locsin Montelibano Memorial Regional Hospital.
Sa interview sang Bombo Radyo Bacolod kay Police Major Richard Fajarito, hepe sang Bacolod Police Station 3, pag-abot sang biktima halin sa duty, ginhakos sini ang iya utod antes nagsulod sa iya kwarto.
Pasado alas-4:00 sang hapon sang nakabati sang lupok ang mga upod niya sa balay kag mga kaingod apang wala man nila ini ginsapak.
Samtang, pasado alas-6:00 kagab-i, natingala ang pamilya sini nga wala na siya nakaggwa sa iya kwarto.
Suno kay Fajarito, gintuktok sang pamilya sang biktima ang kwarto sini apang nakalock ang pwertahan.
Sang ila nga ginlantaw ang sulod, ila nakit-an nga duguon nga nagahigda sa iya nga katre ang biktima.
Sa inisyal nga imbestigasyon sang kapulisan, isa ka .38 caliber revolver ang armas nga gingamit sang biktima sa pagtiro sa iya kaugalingon.
Nakaangkon ini sang igo sa iya ulo nga gintunaan sang iya kamatayon.
Sa karon wala pa matumod kun ano ang rason sa pagpanginmatay sang biktima.
Apisar nga hipuson ang iya pagkakilala sa biktima, wala naman naglaom ang himata sini nga siya ang maghikog.
Sa interview sang Bombo Radyo kay Benedict Intuna, hipuson kag masekreto ang iya pagkakilala sa 29-anyos nga himata.
Masami ini nga nagakadlaw apang wala ini maayo nagapautwas sang iya ginabatyag.
Suno kay Intuna, wala man ini nagapanugid sang iya ginapanumdum.
Tuman ang iya kakibot sang nabatian ang balita bangud wala gid siya naghuna-huna nga mahimo ini sang iya himata.
