Mahimo nga suguran na sa masunod nga semana ukon sa ikatatlo nga semana sang bulan sang Mayo ang pagpanagtag sang fuel subsidy sa mga corn farmers sa Region 6 kadungan sang pagsaka sang presyo sang produktong petrolyo.
Suno kay Albert Barrogo, regional technical director for operations sang Department of Agriculture Regional Office 6, yara sa 3,222 ka mga corn farmers sa bilog nga Western Visayas ang makabaton sang ayuda nga P3,000.
Sa bilog nga Negros Occidental, nagadangat sa 165 ang inisyal nga numero sang benepisyaryo sa tatlo ka local government unit.
Sila ang nagikan sa Hinobaan nga may 101, Kabankalan nga may 24 kag San Carlos kag 40 farmers.
Matapos ang validation, 24 na ka farmers sa Hinobaan ang naqualify nagikan sa 101; naglapaw naman ang naqualify sa San Carlos nga nagdangat sa 73; kag wala naman sang naqualify nagikan sa 40 ka applicant sa Kabankalan bangud wala na sila nagatanom sang mais subong.
Bangud sini, gindugang sa San Carlos ang 40 nga para kuntani sa Kabankalan gani nagdangat sa 73 ang benepisyaryo sa nasambit nga ciudad.
Suno kay Barrogo, 753 na ka pangalan ang nasumiter sa DA Central Office kag nagapadayon ang review diri.
Magapatawag naman sang meeting sa masunod nga semana agud matumod kun sin-o sa 753 ang mareleasan sang subsidy sa masunod nga semana ukon sa ikatatlo nga semana sang Mayo.
Sa instruction ni DA Secretary William Dar, sarang na masuguran ang release sa Mayo 10.
Sa kabug-usan, P495,000 ang pondo nga allocated para sa Negros Occidental.
