Padayon pa nga ginabulong sa ospital ang duha ka mga persona matapos mapilasan sang magbunggo ang isa ka fuel tanker truck sa waiting shed sa Crossing Valderama, Barangay Luna ciudad sang Cadiz.
Ginkilala ang mga naospital nga sanday Rose Ann Galang, 21-anyos kag James Colonia, 35-anyos kag isa ka government employee.
Lunsay gindala ang mga ini sa Cadiz District Hospital apang ginsaylo sa ospital sa ciudad sang Bacolod si Colonia para sa dugang nga pagbulong.
Sa interview sang Bombo Radyo Bacolod kay P/Lt. Col. Robert Mansueto, hepe sang Cadiz City Police Station, ginpahayag sini nga nagikan sa ciudad sang Bacolod kag padulong sa Escalante City ang fuel tanker nga ginapanag-iyahan sang Gothong Manufacturing Corporation nga naka-base sa Mandaue City, Cebu kag ginamaneho ni Allan Atillo, 53-anyos kag residente man sang Mandaue City.
Santo sa inisyal nga imbestigasyon, hinali nalang nga nag-isi-isi ang dalagan sang tanker sa kurbada nga dalan kag nabungguan sini ang ginasundan nga tricycle nga ginadala naman ni Arvie Densing, 37-anyos kun sa diin nagasakay si Galang kag lunsay mga residente sang Barangay Luna, Cadiz City.
Matapos makabunggo sa tricycle, nagdiretso ang tanker sa waiting shed nga nahamtang sa nawala nga bahin sang highway kun sa diin nagahulat sang salakyan si Colonia.
Suno kay Mansueto, gina-alegar sang driver sang tanker nga wala niya natalupangdan nga nag-U-turn ang ginasundan sini nga tricycle.
Sa karon yara sa kustodiya sang Cadiz City Police Station si Atillo kag ang fuel tanker para sa nagakaigo nga disposisyon.
