Ginpatuman ang full road closure sa pila ka bahin sang Lacson Street, Bacolod City umpisa alas-8:00 sang gab-i, Martes, Oktubre 22, tubtob alas-5:00 sang aga sa Oktubre 28.
Ang closure ang ginpatuman agud nga mahatagan sang tion ang pagpahamtang sang mga stage, booths, kag kiosko para sa palaabuton nga Food and Music Festival sa Lacson Tourism Strip sa Oktubre 25 tubtob 27 bilang bahin sa selebrasyon sang Masskara Festival.
Una na nga ginpahayag ni Bacolod Traffic Authority Office (BTAO) Deputy nga si Jose Antonio Robello nga ang mga organizer magabutang sang 6 ka stage para sa mga performers kag iban pa nga mga national entertainers kag personalities.
Magasugod ang temporaryo nga road closure sa intersection sang BS Aquino Drive kag Lacson Street tubtob sa intersection sang South Capitol Road tubtob alas-5:00 ang takna sang kaagahon sang Oktubre 27.
Ang tanan nga mga salakyan,kalakip na ang mga public utility vehicles nga nagabyahe northbound, ginapanugyanan nga mag-agi sa dalan Gatuslao, samtang ang mga nagapadulong sa south ang kinahanglan nga mag-agi sa dalan Aguinaldo.
One-way traffic scheme ang ginpatuman sa duha ka dalan Gatuslao kag Aguinaldo.
Mahimo nga maglibot ang mga motorista sa BS Aquino Drive kag San Juan Street.
Ginalauman nga madamo sang mga tumalan-aw ang magapuno sa mga aktibidad nga patigayunon sa Lacson Street bilang ini man ang ginakabig nga higlights sang tuigan nga Masskara Festival.
