Nagtsekyar kag naghinun-anon si Bacolod City Lone District Congressman Alfredo “Albee” Benitez sa hospital director kag department heads sang Corazon Locsin Montelibano Memorial Regional Hospital (CLMMRH).
Sa interview sang Bombo Radyo Bacolod kay Councilor Atty Caesar Distrito, naghinun-anon si Congressman Albee kay Medical Center Chief II Joan Cerrada, agud seguruhon ang full implementation sang zero billing policy nga ginapatuman sang National Government.
Interview with Bacolod City Councilor Atty Caesar Distrito
Ginpasalig nga ini ang ginapatuman na sa wards, apang ang masami nga problema ang may kaangtanan sa Philippine Health Insurance Corporation (PhilHealth).
Suno diri, sarang mahimuan sang tikang ni Benitez ang concern sa PhilHealth bangod nagapati ini nga nagakadapat nga tanan nga Pilipino ang miyembro sang PhilHealth kag wala na sang problemahon sa hospital bills.
Gintsekyar man sang kongresista ang construction sang ospital sa tinutuyo nga mapasaka sa 1,000 bed capacity.
Ini bangod masami nga reklamo sang mga nagapa-admit ang madugay nga pag-akomodar sang ospital bangod sa kakulangan sang bed space.
Suno kay Distrito, ang pagconvert sang old building sang Department of Agrarian Reform sa Barangay 14, Bacolod City ang pagahimuon nga primary health care center nga mahamtangan sang mga pasyente nga tuman ka seryoso ang kondisyon.
Ini ang lakip sa mga proyekto sang Benitez Administration nga napadayun sa Gasataya Administration.
Sa karun ginatipon sang kongresista ang mga concerns kag ini ang plano niya nga mapresentar kag masolusyunan paagi sa pagdala sang mga ini sa Head Office sang Department of Health (DOH).
Suno kay Congressman Albee, deserve sang Bacolodnon kag Negrense ang mas maayo nga health services.
