Pagabuksan sang Pilipinas ang borders sini sa mga fully vaccinated international travelers sumugod sa Huwebes bilang kabahin sang recovery drive sang tourismo sa pungsod.
Suno kay Tourism Secretary Bernadette Romulo-Puyat, ginakabig niya ini nga “exciting times” para sa tourismo sang Pilipinas kadungan sang pagsugod sang pungsod sang dalan padulong sa recovery.
Suno sa iya, isa ka welcome development ang pagpahanugot sa mga international travelers nga magaduso sa pagbalik sang travel kag tourism sector, pagbalik sang mga trabaho kag iban pa nga benepisyo nga mabatyagan sa bilog nga tourism value chain.
Gin-aprubahan sang pandemic task force sang gobyerno sang katapusan sang Enero ang proposal sang Department of Tourism nga pahanugutan ang pagsulod sang mga fully vaccinated tourists nagikan sa 157 ka mga pungsod nga may vise-free arrangements sa Pilipinas.
Gindula naman sang task force ang color-coded classification system sang mga pungsod santo sa ila COVID-19 status bilang kabahin sang plano agud ma-accelerate ang recovery sang tourism industry.
