Gin-aprubahan na sang Committee on Appropriations sa Kongreso ang funding provision sang hagna nga nagaduso sa pagtukod sang Negros Island Region.
Suno kay Negros Occidental 6th District Representative Mercedes Alvarez, matapos gin-aprubahan sang Committee on Appropriations ang funding provision sang pagtukod sang NIR, ini ang iga-endorso sa Committee on Rules sa second reading kun sa diin may patigayunon nga plenary debate.
Kun wala sang objection, ini ang igapasa sa third and final reading.
Kun mapasar, ini ang igaforward sa Senado.
Suno kay Alvarez, may yara sang amendment nga ginsuggest ang Committee on Appropriations kun sa diin ang initial budget ang iga-charge sa current budget sang Department of Interior and Local Government (DILG).
Suno sa iya, tinutuyo sini nga magtukod sang technical working group nga amu ang magaformulate sang roadmap sang NIR.
Ang technical working group ang pagapamunuan sang Office of the President kag pagalakipan sang tanan nga mga kongresista kag mga alkalde sang imbolbado probinsya.
Ang DILG amu ang mangin secretariat sang technical working group rason kun ngaa sa ila pagakuhaon ang budget.
Nagalaom ini nga mahatagan ini sang prayoridad sang Committee on Rules bangdu ila ginalauman nga matapos ang ila session sa katapusan sang bulansang Marso.
