Nakita na sang mga otoridad sa western Alaska ang isa ka gamay nga eroplano nga na-missing Huwebes sang hapon, oras sa Pilipinas.
Suno sa Alaska Department of Public Safety, ang single-engine turboprop aircraft ang gina-operate sang Bering Air kag nagbyahe halin sa Unalakleet padulong sa Nome.
Ginkumpirmar naman sang mga otoridad nga ginbawian gid sang kabuhi ang siyam ka pasahero kag 1 ka piloto nga sakay sini.
Ginkasubo sang Bering Air ang natabo kag nagpalab-ot sang pagpakig-unong sa pamilya sang mga napatay.
Ini na ang ikatatlo nga major aviation accident nga natabo sa US sa sulod sang walo ka adlaw.
Madumduman nga nagcollide ang commercial airliner kag military helicopter sang Enero 29 kon sa diin masobra 67 ang napatay.
Duha ka adlaw pagkatapos sini, isa naman ka air ambulance ang nag-crash sa Philadelphia nga nagresulta sang kamatayon sang pito ka indibidwal.
