Ginpasalig sang Bacolod Environment & Natural Resources Office (BENRO) nga padayun ang paghakot sang basura sang IPM Construction and Development Corporation subong nga Holy Week.
Sa interview sang Bombo Radyo Bacolod kay BENRO Head Ma. Fe Tres Fuentes, apisar padayun ang garbage collection, nagahingyo ini sang pasaylo bangod aminado ini nga may mga lugar nga indi malab-utan sang serbisyo.
Ini bangod iban sa mga driver sang garbage truck kag mga paleros ukon garbage collector ang may panata sa tion sang Semana Santa.
Agud magpadayun ang operasyon, sila ang nagatanyag sang incentive kun sa diin sa kada duha ka trip, sila ang makabatun sang sweldo nga para sa tatlo ka trip.
Hatagan man ang mga ini sang meal allowance.
Ang scheme ang gin-anunsyar na sa ila ginpatigayon nga coordination meeting sa tinutuyo nga maduso ang mga drivers kag paleros nga magtrabaho halin subong nga Huwebes Santo tubtob sa Domingo de Paskwa.
