Ginsalo sang Calatrava municipal government ang gasto sa haya kag pagpalubong sang magtiyo nga biktima sang pagpangluthang-patay sang ginapatihan mga katapo sang New People’s Army (NPA) sa Sitio Upper Ikugan, Barangay Minapasuk, Calatrava, Negros Occidental.
Madumduman nga ginpatay sang gina-alegar pito ka armado nga mga kalalakinhan ang mga biktima nga sanday Felix Resutai kag ang hinablos sini nga si Elisio Resutai.
Antes ang mga ini nagbiya sa lugar, nagpaandam pa ang mga armado sa bata ni Felix Resutai nga indi sini pagsundon ang amay nga isa ka intelligence sang Philippine Army kag nagpamahog nga sila ang magabalik pa sa lugar bangod madamo pa ang mga ini nga pagapatyon.
Kasunod sini, nagka-engkwentro naman ang tropa sang Calatrava Municipal Police Station kag mga rebelde sa Sitio Kalanugan, Barangay Minapasuk nga nagresulta sa pagkamatay ni Police Corporal Jayme Nuñez nga natalana kuntani nga ikasal sa Desyembre.
Samtang pilason naman sanday Police Capt. Jesus Alba, deputy chief of Police sa Calatrava Municipal Police Station, Police Corporal Dennis Nasis kag Police Corporal Frank Caballero.
Sa interview sang Bombo Radyo Bacolod kay Calatrava Mayor Marilyn Era, sa karun wala pa sila gihapon sang identity sa may kahimuan sang mga pag-atake sa magtiyo kasubong man sa naka-engkwentro sang mga kapulisan.
Ginpasalig naman sang alkalde nga ginsalo na sang Municipal Government ang pagpalubong sa biktima samtang sila ang naghatag naman sang cash assistance agud makabulig sa gastos sa pagpatigayon sang haya, nga nagikan mismo sa kaugalingon nga bulsa sang alkalde.
Ang bangkay sang magtiyo nga Resutai ang ginhaya naman sa covered court sang Barangay Minapasuk bangod nagakahangawa ang mga himata sini nga magbalik ang mga armado kun sila ang didto magatipon sa balay sang biktima.
Samtang ang bangkay naman ni Police Corp. Nuñez ang yara na sa kamot sang iya pamilya.
Mensahe naman ni Mayor Era sa mga pumuluyo sa lugar nga sila ang mahimo na nga makabalik sa ila normal nga pagpangabuhi kag ihatag na lamang sa mga otoridad ang pag-imbestigar sa kaso.
Aminado man ang alkalde nga wala ini sang ihibalo kun may koordinasyon ang kapulisan kag militar sang natabo ang engkwentro.
Ginalantaw naman sini ang posibilidad nga mabutang sa listahan sang hot spot area ang banwa sang Calatrava bangod sa insidente.
