May patigayonon nga rally ang General Alliance of Workers Association (GAWA) sa Labor Day sa Mayo 1 para ipanawagan sa gobyerno ang ila promisa nga ginpasalig sa mga mamumugon nga wala natuman tubtob subong.
Sa interview sang Bombo Radyo Bacolod kay GAWA secretary general Wennie Sancho, naga-upod ini sa tanan nga mamumugon sa Pilipinas para sukton ang gobyerno sa mga pasalig nga ginbuy-an nila nga wala man natuman kag nakabulig sa kapigaduhon sang mga mamumugon.
Suno diri, ang problema sa korapsyon tuman nga naga-apekto sa mga workers bangod sila ang nagatrabaho bisan wala sang husto nga sweldo apang sila pa ang ginakawatan.
Suno kay Sancho, bisan ano nga trabaho sang mga mamumugon, kaangay nga mas nagapigado pa gid sila bangod wala sa gihapon nahatag ang madugay na nila nga ginapangayo nga wage increase.
Pahayag sini, ang workers amo ang nagapanguna nga rason kun ngaa nagalakat ang ekonomiya apang ginapalangga lamang sila sa tion sang labor day kag kada eleksyon.
Para kay Sancho, wala sang konkreto nga solusyon ang gobyerno para sa kapigaduhon kag gutom nga nagaka-eksperyensyahan sang mga mamumugon.
