Ginseguro sang Secretary General sang General Alliance of Workers Association (GAWA) nga siya ang makatambong sa patigayunon nga public consultation para sa wage increase sa Negros Occidental Provincial Capitol Lagoon sa Oktobre 10.
Sa interview sang Bombo Radyo Bacolod kay Wennie Sancho, luyag sini nga mapakigbato ang sektor sang mamumugon kag mapahangop sa Regional Wage Board kun ano ka importante ang pagpasaka sang sweldo.
Suno diri sa general rule, kuntani 60 ka adlaw antes ang anibersaryo sang ulihi nga wage order, nakapatigayon na sang public hearing, samtang dapat naman nga makapagwa sang bag-o nga wage order sa sulod sang 45 ka adlaw.
Apang pahanumdom sini nga sang Nobyembre 16, 2023 pa ginpagwa ang ulihi nga wage order nga nagpasaka sang P50 sa sweldo kada adlaw.
Ginakwestyon man ni Sancho ang mas manubo nga wage increase bangod dapat progressive ini ukon dapat malapawan sang bag-o nga wage order ang kantidad sang nauna.
Suno diri, P65 ang una nga wage increase antes ang P50 sang nakaligad nga tuig.
Panindugan sini nga ang mas manubo nga wage increase ang katumbas sang inhustisya para sa mga mamumugon.
Suno diri sang siya ang miyembro pa sang Regional Wage Board, ginatinguhaan sini nga ma-update ang mga workers sa mga developments, apang sa karun ini ang mabal-an lamang kun hungod nga pamangkuton kag sa masami indi pa derekta nga makasabat.
Panawagan sini sa mga labor representatives nga indi magsalig sa data sang gobyerno, bangod ini ang tuman ka konserbatibo.
Suno kay Sancho, dapat una nga tumuron ang paghuyang sang purchasing power kag ang real value sang piso.
Nagapati ini nga sa pagrestore pa lamang sang nagadeteriorate nga value sang piso, dako na ang lalagson sang gobyerno.
Nagalaom si Sancho nga sa matabo nga public hearing, pahanugutan ang pagbayluhanay sang mga data kag impormasyon ukon mga pamangkot.
Hugot nga ginatindugan ni Sancho nga ang panawagan sa wage increase ang panawagan man sa social justice.
