Ginpanindugan sang Secretary General sa General Alliance of Workers Association (GAWA) nga oligarchy ang panggobyerno sang Pilipinas imbes nga demoractic ukon republican form of government.
Ini kasunod sang naggwa nga resulta sa 2023 Corruption Perceptions Index of Transparency International kun sa diin 34 out of 100 ang score sang Pilipinas, nga nagakahulugan nga kita ang yara sa ika-115 gikan sa 180 ka mga pungsod kag teritoryo kun kurapsyon ang pagahambalan.
Sa interview sang Bombo Radyo Bacolod kay Wennie Sancho, wala kamatuoran nga ang Pilipinas ang democratic ukon republican form of government bangod kun sin-o ang may kwarta, yara sa puder kag may gahom, sila man ang makagagahom sa gobyerno.
Suno diri, madamo sang nagakaganyat nga makaangkon sang gahom, bangod ini ang makahatag sang permanente nga pwesto sa gobyerno.
Dugang pa ni Sancho nga wala man naga-epekto sa Pilipinas ang layi tuhoy sa political dynasty.
Pahayag pa sini nga makita nga kurapsyon sa gobyerno, ang nagaserbe nga malain nga halimbawa.
Kalakip sa ahensya sang gobyerno nga nagapanguna sa kurapsyon ang Bureau of Customs kag Bureau of Immigration.
Nagapati si Sancho nga bisan ano ang amendment sa konstituyon ang iduso sang mga opisyales sang gobyerno, kun nagapabilin ang pagpanggamot sang kurapsyon, amat-amat gihapon nga maga-usmod ang pungsod.
Aminado ini nga wala na nahadlok ang mga nagabuhat sang kurapsuon bangod ini ang ginatolerar lamang.
Suno kay Sancho, isa sa napulo ka mga kaso nga ginapasaka sang ordinaryo nga mamumugon batok sa mga dalagkuan nga negosyante lamang ang nagadaog kag kalabanan ang wala sang hustisya bangod nagakadaog sang kwarta.
Dugang pa sini nga ang mga taxes nga ginahatag sang mga Pilipino ang nagakadto na lamang sa graft and corruption.
