Nagpasalig ang general manager sang Bacolod City Water District (BACIWA) nga may yara sang solusyon nga gindihon para sa kakulangan sang tubig nga mahimo matuman sa sulod sang duha ka bulan.
Sa interview sang Bombo Radyo kay Mona Dia Jardin, nagplastar sang short term kag long term solution ang Baciwa-Primewater kag ang ciudad sa pagpanguna ni Bacolod City Mayor Alfredo Albee Benitez.
Suno diri, bangod sa El Niño nagnubo sa 12 percent ang volume sang water production nga sa karun ang deep well ang yara sa gihapon sa maayo nga kondisyon apang kun magpadayon ang El Niño, posible nga magnubo na gid ang water production.
Suno kay Jardin, nagdihon sang immediate solution ang Baciwa kag ciudad nga mahimo lamang sa sulod sang duha ka bulan.
Magakuha sang 17 million liters per day water supply gikan sa deepwell kag Bocal-Bocal Spring sa Barangay Alangilan ang Primewater, samtang ang ciudad naman sang Bacolod ang maga-initiate sang dugang nga 20 million liters per day halin sa Matab-ang River nga dapat nga may itukod nga impounding kag filtration facility.
Suno kay Jardin, ila ginatrabaho nga mahatag ang insakto nga pagtamod ang problema sa kakulangan sang tubig samtang aminado naman ini nga ang long term solusyon amo ang posible nga matabo duha ukon tatlo pa ka tuig.
Pahayag sang general manager sang BACIWA, ang ciudad nagakinahanglan sang 90,000 million liters per day apang 76,000 MLD lamang ang mahatag sa karun.
