Nagpanawagan ang General-Manager sa Central Negros Electric Cooperative (CENECO) sa publiko sa pagbuylog sa Earth Hour 2024.
Nahibaluan nga sa Earth Hour 2024, ginapanawagan ang ululupod nga pagpatay sang mga suga kag iban pa nga appliances alas-8:30 tubtob alas-9:30 karun sa gab-i.
Sa interview sang Bombo Radyo Bacolod kay Atty Arnel Lapore, ang Earth Hour 2024 ang global activity nga ginabuylugan sang nagkalainlain nga pungsod bilang effort sa pagpakita nga kinahanglan ang pagconserve sang energy resources.
Suno kay Lapore, ini man ang ila panawagan sa mga member consumer nga hatagan sang tion nga makabuylog sa aktibidad.
Pahayag sini nga imando sini sa consumer service department ang pagkampanya sa lihok sa paghatag sang breathing space para sa Mother Earth.
Panindugan sini nga maayo ang tinutuyo sang programa, nga para sa conservation kag proteksyon sang kalibutan.
Apang pahanumdom ni Lapore nga mas maayo nga indi lamang sa tion sang Earth Hour patigayunon ang kaangay nga conservation kundi ini ang dapat nga padayunon.
Nakadepende naman sa mga local government units (LGUs) kag private individuals kun sila ang maga-upod sa aktibidad, apang pasalig ni Lapore nga ang CENECO head office ang maga-upod sa Earth Hour 2024.
Suhestyon man sini nga agud mas makaconserve sang energy resources, mas maayo nga magconvert sa solar energy partikular na ang mga suga nga ginapulawan sa bilog nga gab-i.
Suno diri, indi man tuman ka mahal ang mga solar lights kag ini ang dako nga bulig partikular na kun may mga brownout.
