Ginapasalamatan sang General Manager sa Central Negros Electric Cooperative (CENECO) ang pagpasar sa House Committee on Legislative Franchises sang hagna para sa pagtukod sang Negros Electric and Power Corporation (NEPC).
Madumduman nga ang NEPC amo ang Joint Venture Agreement (JVA) sa tunga sang CENECO kag Prime Electric Holdings Inc., samtang ang hagna ang gin-author naman ni Abang Lingkod Partylist Representative Stephen Paduano.
Sa interview sang Bombo Radyo Bacolod kay Atty Arnel Lapore, na-apresyar sini ang suporta sang kooperatiba bangod magluwas sa co-author nga si Juliet Marie Ferrer kasubong man ni Bacolod City Lone District Congressman Greg Gasataya.
Kasunod sang pagpasar sa committee level, ini ang masaka na sa plenaryo.
Ginalantaw ni Lapore nga ang hagna ang mahimo talakayon na sa 3rd reading kag ipasaka sa Senado sa 2nd week sang Enero.
Samtang mahimo naman nga sa Marso ukon Abril mapasaka na sa Malacañang para sa pagpirma ang Presidente ang hagna agud opisyal na nga mangin layi.
Sa karun ang CENECO kag Prime Electric ang nagapatigayon sang geomapping kag tagging sang individual meter holders sa nagkalainlain nga franchise area sang electric cooperative.
Paathag ni Lapore nga ang purpose sang NEPC amo ang ma-enhance ang pagresponder sa mga emerhensya kag agud mangin efficient kag effective pa ang serbisyo.
Pinaagi sa GPS sa mga metro, sa tion nga may magluntad nga problema sa linya sa kada service area, mahapos lamang ini nga makit-an sang mga empleyado.
Gin-athag ni Lapore nga ang 50-years franchise sang CENECO ang matapos sa 2030, samtang 25-years naman ang prangkisa sang NEPC.
Sa tion nga ma-issuehan na sang Certificate of Necessity and Public Convenience ang NEPC, igaturn-over na diri ang operation sang distribution utility.
Paathag ni Lapore, 30 porsyento sang stocks sa NEPC ang magapabilin nga ginapanag-iyahan sang CENECO.
