Gin-ako sang general manager sang BACIWA nga may yara sang kakulangan sa supply sang tubig sa ciudad sang Bacolod.
Sa interview sang Bombo Radyo Bacolod kay Mona Dia Jardin, kahapon nagtambong ini sa water summit nga ginpatigayon sang city government sa pagpanguna ni Bacolod City Mayor Alfredo “Albee” Benitez.
Suno kay Jardin, nagtambong man ang mga tiglawas sang Prime Water nagikan sa ila nga central office sa ginpatigayon nga water summit.
Suno diri, maayo man ang gindiskusyunan sa water summit kag pila diri ang kakulangan sang tubig, ang turbidity ukon malubog nga daw kaangay sang ice tea kag indi 24 hours nga pagtubod sang tubig.
Madugay naman ang mga ini nga nagaako nga dako gid man ang kakulangan sang supply sang tubig.
Suno kay Jardin, ang long term solution sa kakulangan sang tubig ang matigayon pa sa 2025 ukon 2026 apang ang Bacolod Bulk Water Inc nga isa sa stakeholder sang Baciwa-Primewater ang nagpahayag nga sa sulod sang anum ka bulan, nga makahatag sila sang 10 tubtob 15 MLP paagi sa injection point number 2.
Samtang isa man ang Murcia Water District nga buligan man ang water district sa ciudad sang Bacolod agud nga masolusyunan ang problema sa tubig.
Nakakuha man sila sang approval nagikan sa mga executives sang Primewater para sa mga stakeholders nga luyag nga magsupply sang bulkwater sa water district sang ciudad.
Sa pihak nga bahin nagpangayo ini sang pasaylo sa mga pumuluyo sa kakulangan sang water district kag nagpasalig ini sila ang nagapaninguha nga mahatagan sang solusyon ang mga ginpadangay nga problema sang mga ini sa natapos nga water summit.
