Magahulat pa ang general manager sang Central Negros Electric Cooperative sa guidance kag instructions sang National Electrification Administration (NEA) tuhoy sa joint venture agreement (JVA) proposal sang Meralco kag MORE Power sa CENECO.
Sa interview sang Bombo Radyo kay Atty. Arnel Lapore, for transmittal na ang unsolicited proposal sa NEA kag ila pa pagahulaton kun ano ang mangin guidance kag instructions tuhoy diri.
Suno kay Lapore, ini bangud nga ang NEA ang supervisory agency sang CENECO kag tanan nga desisyon kag board resolution ang ginalantaw sini.
Suno sa iya, kun anuman man ang feedback sang NEA, dira sila magahimo sang tikang kaangay na lamag kun maghambal ang ahensya nga tun-an ang JVA proposal, kinahanglan ini nga pamatian kag tun-an sang CENECO.
Aminado ini nga may nagkalain-lain nga panan-awan ang mga empleyado sang electrive cooperative tuhoy diri kag may pila nga nagaduha-duha bangud sa kahangawa nga maapektuhan ang ila security of tenure.
Apang ginhambalan lamang ang mga ini ni Lapore nga tubtob nga siya ang general manager, iya igapakigbato ang kinamatarong sang mga empleyado sa idalum sang labor code.
Nagpanugyan lamang ini nga indi maghatag sang emosyon kag atensya sa JVA proposal kag magfocus lamang sa trabaho.
Suno sa iya, mas maayo nga maghulat na lamang sa komento kag paggiya sang NEA sa ila.
Samtang wala pa ang desisyon sang ahensya, suno diri, mas maayo nga magpadayon sila sa pagtrabaho kag magfocus sa pagpanubo sang systems loss kag pag-improve sang financial nga aspeto sang electric cooperative.
Suno kay Lapore, dapat nga mahatagan sang maayo nga serbisyo ang mga konsumedor nga amu ang matuod-tuod nga tag-iya sang kooperatiba.
