Ginkumpirmar sang general manager sang Central Negros Electric Cooperative (CENECO) nga nabaton sang opisina sini ang sulat ni Power Watch convenor Wennie Sancho nga nagapanawagan sang imbestigasyon angot sa nagluntad nga brownout sang March 21 kag April 11.
Ang nasambit nga brownout ang nakatuga sang kabudlayan sa mga konsumidor.
Sa interview sang Bombo Radyo Bacolod kay Atty Arnel Lapore, may yara na ini sang nabaton nga initial nga report gikan sa mga engineers kag ang initial findings sang mga ini sa pagkautod sang main line sa 69KV ang bangud sa force majeure.
Suno kay Lapore, bangud sa tuman kainit nga panahon ang wire ang nagakatunaw man kag natam-an na ka santing ang pagconnect gani nagresulta sa pagkabugto.
Ginpahayag man nga nagkihanglan sang duha ka boom trucks agud nga makay-o sang mga line men ang nasambit nga nautod nga linya.
Suno kay Lapore, may yara man sila sang ginmanual load dropping sa malapit nga feeder para sa safety sang ila nga mga crew nga nagkay-o a nautod nga linya sang kuryente.
Gin-athag man sini nga dako ang iya pagsalig sa mga empleyado sang CENECO apang indi man sini mabasol kun may mga tawo nga magdumdum nga may pagsabotahe nga natabo.
Suno diri, indi man malipod nga may yara sagihapon sang nagapamatok sa Joint Venture Agreement sa tunga sang CENECO kag PrimeElectric.
Gani indi sini mabasol si Power Watch convenor Wennie Sancho kag ang grupo sini nga magpanumdom nga mahimo nga may nagsabotahe sa nagluntad nga mga brownouts.
Liwat naman ini nga nagpanawagan sa mga empleyado sang CENECO nga indi pagrisgo ang ila nga mga retirement benefits kag bwas-damlang sang ila nga pamilya sa paghimo sang mga ginadumulian nga butang kaangay sang pagsabotahe sa operasyon sang CENECO.
