Nag-apelar ang general manager sang Panasiatic Solutions nga indi pag-idiscriminate ang ila mga empleyado.
Sa virtual press conference nga ginpatigayon ni Siony Ferraris, gin-athag sini nga fake news ang nagalapta nga balita nga 200 ka mga empleyado sang nasambit nga BPO company ang nagpositibo sa virus.
Suno kay Ferraris, 200 ka mga empleyado ang ginpaidalum sa rapid test kun sa diin duha lang ang nangin reactive.
Gilayon ang mga ini nga ginpaidalum sa RT-PCR test sang Hulyo 27 kag lunsay nagpositibo sang Agosto 3.
Suno kay Ferraris, sang Hulyo 27 pa lang, nagpatigayon na sila sang full disinfection, contract tracing, kag ginpaidalom sa rapid test ang mga nakacontact trace kag lunsay non-reactive ang mga ini.
Apisar sang resulta suno sa general manager, ila gihapon ginsunod ang health protocol kag ginpaquarantine sang 14 ka adlaw ang mga empleyado.
Gindugang man sini nga wala ginapahanugutan nga magreport sa ulubrahan ang mga nagasuprer sang sintomas sang COVID-19 kag ginapacontact lang sa ila hotline para sa nagakaigo nga guidelines.
Suno kay Ferraris, transparent gid ang Panasiatic Solutions sa pagpahibalo sa Bacolod City Government sang sitwasyon sang ila mga empleyado kag gin-inspeksyon man ini sang Department of Labor and Employment.
Suno diri, transparent man ang kompaniya sa ila mga empleyado kag wala sang kamatuoran nga wala ang mga ini nagasunod sa safety measures.
Gin-athag man sini nga wala pa nakaabot ang resulta sang roommate sang una na nga nagpositibo kag iloy sini gani fake news man ang nagalapta nga nagpositibo na ang duha.
Ginakasubo man sang general manager nga bangud sa mga fake news, indi na maayo ang pagtratar sa ila mga empleyado bangud madamo sa mga ini ang wala na ginapasulod sa ila mga boarding house kag apartments apisar nga ila na ini nabaydan bangud sa kangahawa nga nagasuprer sila sang balatian.
Suno kay Ferraris, prayoridad sang kompaniya ang kaluwasan sang ila mga empleyado gani wala sang dapat kahangaw-an bangud ila man ginasunod ang tanan nga measures agud mangin hilway sa COVID-19.
Nahibaluan nga tatlo na ka mga business process outsourcing companies sa ciudad sang Bacolod nga may empleyado nga nagpositibo sa coronavirus disease.
