Nakit-an subong nga aga nga naka-park sa sulod sang O’Hotel sa Barangay 37, Bacolod City ang gina-alegar get-away vehicle sang apat ka mga persona nga nagluthang patay sa 37 anyos nga si Harold John Suarez sa Charito Heights Subdivision, Barangay Granada sang Biyernes sang gab-i.
Pahayag ni Security Guard Ahente, nga kaina lamang sang aga nila nakit-an nga nakapark ang Isuzu Highlander apang ang salakyan ang wala sa ila nga log book.
Ginalantaw nila ang posibilidad nga ini ang ginpasulod kahapon, apang bangod sa tuman ka damo nga bookings, wala ini natalupangdan kag nagsulod nga wala narecord.
Suno sa Security Guard, operational ang ila nga CCTV camera, apang indi pa ini ma-access bangod wala sang opisina ang admin staff kun Domingo.
Madumduman nga samtang naga-inom sang makahulubog nga ilimnon kag nagapungko sa atubang sang isa ka tyangge si Suarez, hinali na lamang ginpalapitan sang apat ka mga suspetsado ang biktima kag ginluthang sang makatatlo ka beses.
Ang mga biktima ang ginkilala nga sanday Matt John Espoli, Rodzel Gonzales Espoli, Mark Torres kag alyas “Kalbo”.
Santo sa imbestigasyon sang Bacolod Police Station, ginalantaw nga motibo sang krimen ang pagpangimon ukon personal nga kaakig.
Nahibaluan nga ang gina-alegar live-in partner sang biktima nga si alyas “Joy” ang nagatrabaho bilang home service massage therapist kag kliyente man sini ang gina-alegar suspetsado.
Dala naman sang mga ini sa pagpalagyo ang Isuzu Highlander nga gina-arkilahan sang mga suspetsado sa amay ni alyas “Joy”.
Matapos ang insidente ginpa-alerto na sang Bacolod Police Station 5 ang iban nga Police Station sa Bacolod City agud magpatigayon sang checkpoints, kag nagkoordinar naman sa mga pier agud malikawan nga makatabok ang mga biktima paggwa sa syudad.
Apang matapos sang pagkakita sang salakyan sa O’Hotel kaina sang aga, gilayon naman ini nga ginrespondehan sang Bacolod Police Station 1 nga nakasakop sa Barangay 37.
Suno kay P/Lt. Ramie Sayson, deputy chief sa Bacolod Police Station 1, bangod sa indi matumod sang mga personnel sa hotel kun ano oras nagsulod ang salakyan, ginadihon nila nga matsekyar ang CCTV footage.
Ginturn-over naman sang mga ini ang kaso sa Bacolod Police Station 5 nga amo ang nagakapot sang kaso may kaangtanan sa natabo nga pagpangluthang sa Barangay Granada.
