Nakit-an ang getaway car nga gingamit sang mga suspek sa pagluthang patay sa driver sang Cosmopolitan Christian Church sa Brgy.Taculing, Bacolod City, sang Agosto 24.
Madumduman nga ginluthang ang biktima nga si Efren Banaglorioso sa atubang sang simbahan apang nakapalagyo ang mga suspek sakay ang itom nga Montero.
Sa interview sang Bombo Radyo Bacolod kay Police Col. Joeresty Coronica, nakit-an ang getaway vehicle sang Setyembre 1 sa banwa sang Salvador Benedicto.
Suno diri, nakilal-an na kun sin-o ang nagapanag-iya sang salakyan kag sa pagpamangkot sa iya nagpahayag ini nga ginhulam ang iya salakyan sang iya kakilala.
Apang, ang salakyan ginpahulam pa gid sa paryente sang kakilala sang tag-iya.
Suno kay Coronica, naestablisyar na nga wala sang involvement ang tag-iya sang salakyan kag iya ginkakibot nga gingamit ang iya salakyan sa krimen.
Dugang pa ni Coronica, indi man mahambal nga mistaken identity ang pagpatay kay Banaglorioso bangod nakit-an nga makapila naglibot-libot sa area ang salakyan antes natabo ang krimen.
May yara sa karun sang gintukod nga special investigation team para masolbar ang kaso kag ini pangunahan ni Police Lt. Col. Lester Leada, Deputy City Director for Operations sang BCPO kaupod ang investigators kag intel personnel halin sa Bacolod Police Station 6 kag BCPO headquarters.
