Nangin mabug-at ang umpisa sang kampanya sang Gilas Pilipinas Girls sa FIBA U18 Women’s Asia Cup matapos sila gintambakan sang defending champion nga Australia, sa score nga 102-47, kahapon sa Karisma Arena sa Seremban, Malaysia.
Madasig nga nakontrol sang Australia ang hampang matapos makuha ang 30-8 lead sa first quarter.
Wala na naka-sunod pa ang Pilipinas sa opensiba sang Australia, samtang nabudlayan man ini nga ma-score sa field.
Dako man ang abanse sang Australia sa rebounding, 60-20.
Sanday Tiffany Reyes kag Zaydhen Rosano ang nagpanguna para sa Pilipinas nga may tig-10 ka puntos.
Kaupod sang Pilipinas kag Australia sa Pool A ang South Korea kag New Zealand.
May kahigayunan pa ang Gilas Girls nga makabawi sa ila masundo nga hampang batok sa South Korea sa Lunes.
