Magahampang ang Gilas Pilipinas batok sa tatlo ka national teams bilang preparasyon sa third and final window sang FIBA 2025 Asia Cup qualifiers sa Pebrero.
Ang makasumpong sang Gilas amo ang Qatar, Lebanon kag Egypt sa 2nd Doha Invitational Cup nga amo ang four-nation friendly tournament nga gin-organisar sang Qatar Basketball Federation.
Patigayunon ang hampang sa Qatar University sa Pebrero 14-16.
Una nga makasumpong sang Gilas ang host country sa pagbukas sang tournament, pagasundan sang Lebanon, kag Egypt sa ulihi nga adlaw.
Sa Pebrero 13 magabiyahe si Coach Tim Cone kag ang national team kaupod si Troy Rosario nga amo ang pinakaulihi nga gindugang sa lineup matapos nakaangkon sang injuries sanday Kai Sotto kag Kevin Quiambao.
Magaupod man ang naturalized player nga si Ange Kouame bangud mangin absent sa training camp ang veteran big man nga si Japeth Aguilar.
Lauman nga magaupod man sa duha ang mainstays sang team nga sanday Justin Brownlee, Scottie Thompson, June Mar Fajardo, CJ Perez, Dwight Ramos, Carl Tamayo, Chris Newsome, Calvin Oftana, Mason Amos, kag ang nagbalik nga sanday AJ Edu kag Jamie Malonzo.
Ini nga friendly games ang magapreparar sa Pilipinas sa posible pagbalos sang Chinese Taipei kag New Zealand sa ila pagkitaay sa masunod nga bulan.
Nahibaluan nga undefeated ang Gilas, 4-0, sa Group B kag antes pa man ang final window, pormal na ini nga naka-qualify para sa FIBA Asia Cup 2025 sa Saudi Arabia.
