Ginpahayag sang Bacolod Police Station 3 nga wala sang may nagluntad nga abduction sa Purok Riverside, Barangay Banago, malapit sa Bata flyover.
Ang isyu ang nagtuhaw kasunod sang pagleak sang video footage sang gin-alegar abduction.
Sa interview sang Bombo Radyo Bacolod sa nakawitness, alas-6:30 kagab-i, yara na sa lugar nagabantay ang pula nga Mitsubishi Mirage.
Una nga naggwa diri ang tatlo ka dalagko lawas nga mga lalaki nga yara sa 30s ang edad, kag pagkadugay-dugay naggwa man ang lalaki nga nakapanapon sang pula nga sa pagbanta sini 20s ang edad.
Suno sa witness, indi sini makita kun may mga lagob ang nakapula nga lalaki, apang kaangay nga ini ang nagapalangluya nga daw malipong kag nagpungko na lamang sa kilid sang salakyan.
Kapin alas-7:00 sang gab-i, nag-abot naman ang babayi nga 20s man ang edad kag gindaho sa nakapula ang trasnparent plastic, nga kaangay sang ginasudlan uling, apang indi sini mamurotan kun ano ang unod.
Sila ang gilayon nga gincorner sang tatlo ka dalagko nga lalaki, ginbaklid ang kamot sang babayi sa likod kag ginpasulod sa salakyan.
Kasunod man nga ginpasulod ang nakapula nga lalaki, kag sila ang ginpatungdan sang duha sa dalagko nga lalaki, samtang sa passenger naman nagpungko ang isa.
Suno sa witness nabatian pa sini nga nagsinggit ang babayi sang “mama!”.
Samtang sa paghalin sang salakyan, lima tubtob napulo ka metros, nagsunod man ang orange nga Toyota Wigo.
Pahayag sang witness nga wala nakapark ang Toyota, apang ini ang nakita nila nga makapila man nga nagalabay-labay sa area antes pa matabo ang gina-alegar abduction.
Samtang ginkumpirmar naman ni Police Captain Rondyl Tapang, station commander sang Bacolod Police Station 3 nga wala sang abduction, wala sang kidnapping kag wala sang nagluntad nga krimen nga dapat imbestigahan bangud ang biktima mismo ang nagmanifest nga wala ini gin-abduct kag maayo ang iya kahimtangan.
