BACOLOD CITY – Natikma sa ginpatigayon nga buy bust operation ang ginaalegar supplier sang shabu sa Purok Tahong, Barangay 2, Bacolod City.
Ang arestado ginkilala kay Micheal Piñoso y Pabalate alias Boyboy Yawa, 22-anyos, pumuluyo sang nasambit nga lugar.
Kagab-i pa ginplanuhan sang Police Station 2, sa pagpanguna ni Police Chief Insp. Benedicto Villarias, nga madakpan si Piñoso apang sini nga hapon lamang ini natyempuhan.
Suno kay Villarias, yara sa watchlist bilang streetlevel target si Piñoso kag ini ang gintudlo ni Victor Sungi, 57-anyos, nga una na nga nadakpan kag nakuhaan sang 56 ka sachet sang shabu, nga supplier sini.
Nakuha kay Piñoso ang apat ka elongated plastic sachet nga nagaunod sang ginasuspetsuhan shabu kag ginabanta may P4,000 nga street value, P2,000 cash nga ginapatihan kita sa pagbaligya sang druga, kag P1,000 nga buy bust money.
Apang ang pahayag sang kapulisan ang hugot naman nga ginpanginwala sang suspetsado.
Suno kay Piñoso, ang mga abyan lamang sini ang nagadagdag sang shabu sa Barangay 2 kag siya lamang ang nagaserbe nga kolektor sang kinitaan sini pagkahapon.
Suno pa sa iya, duha ka bulan pa lamang ini nga nagaobra sang amo nga trabaho kag iya ini ginsulod bangud madasig ang kwarta.
Iya naman ginpanginwala nga iya ang druga nga na-recover sa iya kag gin-alegar naman sini nga may P60,000 nga nasulod sa isa ka bag nga nakuha sa kapulisan.
