Indi pa mapaktan kun malakip sa implementasyon sang 19 percent reciprocal tariff ang ginpadala nga 66,000 tonnes sang raw sugar sa Estados Unidos.
Sa interview sang Bombo Radyo Bacolod kay Manuel Lamata, Presidente sang United Sugar Producers Federation of the Philippines, nakaligad nga duha ka semana sang naghalin gikan sa sea port sa Bacolod City ang duha ka barko nga maka-export sang raw sugar sa America.
Ang mga kalamay ang ginkumbinar nga gikan sa Negros Occidental kag Mindanao.
Suno diri, duha ka barko ang ginsakyan sang nasambitan nga mga kalamay, kag pag-abot sa Estados Unidos, ila naman ini nga hakuton kag irefine.// Ini naman ang ulihi nga sugar export sang Pilipinas subong nga 2025.
Paathag ni Lamata nga antes ang implementasyon sang bag-o nga 19 percent tariff, 10 porsyento lamang ang taripa sa kalamay.
Ang millgate price ang yara sa P2,700 tubtob P2,750 kag ini ang Category A Sugar
Indi pa mahibaluan kun maga-epekto sa karun ang bag-o nga taripa bangod nakalakat na ang barko antes paman magsugtanay sanday President Ferdinand “Bongbong” Marcos Jr. kag US President Donald Trump.
Apang nahibaluan nga 45 ka adlaw ang byahe sang mga cargo vessels gikan sa Pilipinas padulong sa Estados Unidos, samtang ang implementasyon sang 19 percent tariff ang maga-umpisa naman sa Agosto 1.
