Ginahulat nalang sang kapulisan ang resulta sang ginpatigayon nga test agud matumod kun babayi ukon lalaki ang gin-utdan sang duha ka tiil nga ginbilin sa kilid sang isa ka commercial establishment sa CL Montelibano Avenue, Barangay Villamonte, Bacolod City kahapon sang kaagahon.
Sa interview sang Bombo Radyo Bacolod kay Police Capt. Greeky Cayao, station commander sang Bacolod Police Station 4, napadulungan na sang team sang Scene of the Crime Operation ang utod nga duha ka tiil antes gindala sa punerarya agud kuhaan sang sample agud gamiton sa DNA test.
Suno kay Cayao, indi naman ini maangot sa utod nga kamot nga nasapwan sa Purok Kagaykay, Barangay 2 syudad sang Bacolod sang Enero 25 bangud madugayna natabo.
Nagapanawagan si Cayao sa kun sin-o man ang may himata nga namissing ukon gin-abduct nga makig-angot sa ila nga estasyon agud makalantaw sa punerarya.
Suno diri, kun wala sang may mag-claim sang gin-utod nga tiil, igalubong nalang ini.
Wala man sang reported nga mga gin-abduct ukon missing nga mga tawo sa iban nga police station sa syudad sang Bacolod.
Nakacoordinate ang Bacolod Police Station 4 sa Bacolod Police Station 2 bangud icross match man ang DNA sang utod nga kamot sa tion nga magwa na ang DNA result sang utod nga duha ka tiil.
Ginalantaw man sini nga ang mga tiil ang gin-utod sa iban nga lugar kag ginbilin lang sa area sang Station 4.
