Dakop ang isa ka gina-alegar nga drug lord sa ciudad sang Bacolod paagi sa pagserbe sang warrant of arrest sang kapulisan sang Bacolod City.
Sa interview sang Bombo Radyo Bacolod kay Police Lt. Col. Antonio Benitez, pinuno sang Bacolod City Drug Enforcement Unit, ang suspek ang ginkilala nga si Andrew Ledesma, 48 anyos, kasado, negosyante kag residente sang Paglaum Village, Brgy Mansilingan, Bacolod City.
Suno diri, nadakpan sang Enero 19 si Ledesma nga ginakabig nga top 7 most wanted person sa city level kag top 8 sa station level.
Siya ang nadakpan sa atubangan sang isa ka Chinese restaurant sa brgy Villamonte paagi sa pagserbe sang warrant of arrest sang Philippine Drug Enforcement Agency, Bacolod Police Station 8, 2, 10 kag 4.
Ang warrant of arrest sini ang angot sa kaso nga RA 9165 ukon Comprehensive Dangerous Drugs Act of 2002.
Pahayag ni Benitez, ginakabig nga dako nga personalidad sa illegal nga druga si Ledesma kun sa diin siya ang ginatawag nga lord sang mga nadakpan nga drug users apang ini ang ginavalidate pa.
