BACOLOD CITY- Patay ang isa sa duha ka suspek sa gina-alegar pagpang-holdup sa ciudad sang Bacolod matapos nga nagbato sa mga kapulisan kagab-i.
Sa impormasyon nga nakuha sang Bombo Radyo Bacolod, nagdangop sa Bacolod City Police Station 2 ang duha ka mga 21-anyos nga babaye.
Sa panaysayon sang duha ka mga biktima, sila ang naga-panglakaton sa 10th Lacson Street, Brgy. 7 mga las-8:10 kagab-i sang hinali na lang nagpondo ang duha ka suspek nga sakay sa isa ka motorsiklo kag nagdeklarar sang hold-up.
Apang, sa sobra nga kakulba, ginhatag sang isa ka biktima ang bag sini sa backrider, samtang nakadalagan naman ang isa.
Gilayon naman nga nagpatigayon sang hot pursuit operation ang Police Station 2, kag nakit-an ang duha ka suspek nga ginkilala kanday Janjan Beatingo, driver sang motorsiklo, kag Juniben Fulgo, backrider sa bahin sang Burgos Ext. Barangay Villamonte.
Wala naman nagpondo ang mga suspek sang sila ang gin-flagged down, kag hinali na lang nga ila ginpalukpan ang Police Officer nga nagpa-pondo sa ila, rason nga nagbalos tiro ang pulis.
Gilayon naman nga gindala sa Corazon Locsin Montelibano Memorial Regional Hospital si Fulgo bangud nga naka-agum ini sang igo sa paa kag naglapos sa altrasan.
Apang, 3:57 kaina sang kaagahon sang gindeklarar sang doktor nga wala na sang kabuhi si Fulgo.
Padayon naman sa karun nga gina-pangita sang mga kapulisan si Beatingo matapos siya nakapalagyo.
Narekober sang mga kapulisan ang isa ka homemade shotgun ukon sulpak nga may duha ka bala kag ang wala sang plate number nga motorsiklo nga gingamit sang mga suspetsado.
