Gintindugan sang depensa ni Vice President Sara Duterte nga wala sang nakita nga transaksyon sa mga dokumento nga ginsumiter sang Bank of the Philippine Islands (BPI) nga may pirma sang Bise Presidente.
Sa pagpamangkot ni Defense Counsel Atty. Michael Poa, ginpakita niya ang pila sa mga financial documents gikan sa nasambit nga bangko, kalakip na ang mga record nga may kaangtanan sa joint account nanday VP Sara kag former President Rodrigo Duterte.
Santo sa mga dokumento nga ginpakita, ginpahayag ni Poa nga wala sa mga nasambit nga transaksyon ang may pirma ni VP Sara.
Apang, apisar nga wala sang pirma sang Bise Presidente sa mga dokumento nga ginpakita sa cross examination, wala ini gilayon nagakahulugan nga wala sang iban nga paagi sang authorization ukon access sa account.
Ginklaro man sang depensa nga wala sang madumduman si VP Sara nga BPI joint account nga nakapangalan sa ila sang iya amay.
Ini kasunod sang pamangkot ni Senator-judge Risa Hontiveros kay Atty Poa matapos maggwa sa trial ang mga record sang nasambit nga mga account.
Hingyo ni Hontiveros kay Poa nga klaruhon ang posisyon sang depensa angot sa ginapahayag nga indi madumduman nga may partisipasyon si VP Sara sa mga transaksyon nga ginpatigayon sa joint account.
Sabat ni Poa, nga ang punto sang ila nga sulat sa nasambit nga bangko ang agud hibaluon kun existing ang nasambit nga account, kag kun may-ara gid man, luyag nila nga makapangayo sang mga dokumento may kaangtanan diri.
Paathag ni Poa nga kinahanglan nga klaruhon kun may aktwal nga partisipasyon ukon authorization si VP Sara sa mga transaksyon sa nasambit nga joint account.
Samtang, ginkwestyon naman ni Senator-judge Robin Padilla kun ngaa padayun nga ginamensyonar sa impeachment trial ang pangalan ni former President Duterte.
Sa interpellation kay BPI witness Marwin Galvez, ginpahayag ni Padilla nga makapila ka beses na nga ginmensyonar sa hearing ang pangalan sang anay Presidente, nga gina-alegar may joint account kay VP Sara.
Una na nga ginkumpirmar ni Galvez ang joint bank account nga naga-unod sang P96 million, isa ka P41 million time deposit sang 2010, kag isa ka P55 million nga sa ulihi naconvert sa manager’s check.
