Yara sa kustodiya sang Manapla Municipal Police Station ang mga miyembro sang Task Foce Kasanag matapos makuhaan sang armas-luthang kag patalum kag gina-alegar nangkastigo sa isa ka watchman sa Housing Project sa Hacienda Pinanungan, Barangay Punta Salong banwa sang Manapla kahapon.
Sa interview sang Bombo Radyo Bacolod kay Police Capt. Julius Cesar Collado, hepe sang Manapla PNP, nagreklamo sa police station si Dante Artisa, 35-anyos sang nasambit nga lugar matapos ginpahayag nga ginpulihan ini siya kastigo sang pito ka mga miyembro sang Task Force Kasanag.
Nahibaluan nga yara ang presensya sang Task Force Kasanag sa lugar agud magpabilin kuntani sang kalinong bangud gina-awayan ang nasambit nga duta.
Suno kay Collado, duha lamang sa pito ka mga nagkastigo kay Artisa ang iya nga nakilal-an kag nadakpan samtang nakapalagyo naman ang lima.
Ginkilala ang mga ini nga sanday Nilo Besonia, 43-anyos kag Roger Regalado, 53-anyos kag lunsay taga-Barangay Tortosa, Manapla.
Dugang pa sang hepe, sang nagresponder sila sa lugar, narekoberan sang armas-luthang kag patalum ang tatlo ka iban pa nga mga miyembro sang Task Force Kasanag.
Ginkilala ang mga ini nga sanday Ronilo Magbanua, 61-anyos sang Brgy. Tortosa kun sa diin nakuhaan ini sang magnum .22 caliber revolver kag pito ka mga bala; Arnel Absalon, 38-anyos sang Brgy. Felisa, Bacolod City nga nakuhaan naman sang .45 caliber pistol, duha ka mga magazine kag 17 ka mga bala; kag Ronel Gumban, 48-anyos sang Barangay Tangub, Bacolod City nga nakuhaan naman sang patalum.
Sa karon, yara ang lima ka mga miyembro sang Task Force Kasanag sa kustodiya sang Manapla PNP.
