Patay ang gina-alegar notorious nga akyat-bahay matapos makapila ka beses nga ginluthang sa Purok Arao, Barangay Vista Alegre, Bacolod City.
Ang insidente ang ginalantaw nga natabo pasado alas-2:00 sang kaagahon suno sa mga naga-alegar nakabati sang lupok apang ang report ang nabatun sang Bacolod Police Station 7 alas-4:04 na sang kaagahon.
Sa interview sang Bombo Radyo Bacolod kay Police Lt. Regino Robles, deputy chief of police sang Bacolod Police Station 7, ang biktima ang ginkilala nga si Joshua Guardario, 20 anyos, single, wala sang trabaho, tumandok sang Barangay 16, Bacolod City apang narelocate sa Block 8, Lot 14, Purok Arao, Barangay Vista Alegre.
Ini ang may previous cases sang theft kag robbery kag gina-alegar notorious nga akyat-bahay sa Barangay Vista Alegre.
Naabtan nila nga nagakayaon ang biktima, madamo sang igo sang bala sa lawas kag wala na sang kabuhi.
Katupad sini ang duha ka sako kun sa diin ang isa ang naga-unod sang inugbulang nga manok kag ang isa ang may unod nga electric wires.
Ginalantaw sang pila ka residente ang posibilidad nga kinawatan ang unod sang sako.
Sa karun, ginatinguhaan sang kapulisan nga makakita sang ebidensya agud matumod ang nagpatay kag masolbar ang kaso.
Panawagan ni Robles sa mahimo nakakita ukon may nahibaluan nga makig-angot sa ila kag pasalig sini nga protektahan sang kapulisan ang identity sang magaserbe nga witness.
