Patay ang ginaalegar notorious nga kawatan matapos ginluthang-patay sa Purok Cheriza 1, Barangay 27, Bacolod City pasado alas-10:00 kagab-i.
Sa impormasyon nga nakuha sang Bombo Radyo, ang biktima ang ginkilala lamang kay Alyas Ceasar, residente sang Barangay Handumanan, Bacolod City.
Suno sa mga witness, isa ka lupok ang nabatian sang mga pumuluyo.
Nakit-an na lamang ini nga nagadalagan nagikan sa isa ka computeran nga duguon kag daw kaangay nga may nagalagas sa iya.
Suno kay Ariel John Celis, isa sa mga residente, ginaalegar nga imbolbado si Alyas Ceasar sa mga insidente sang pagpangawat sa Libertad kag bagsakan.
Suno kay Police Major Elmer Bonilla, station commander sang Bacolod Police Station 4, nakit-an ang duha ka sachet sang suspected shabu sa possession sang biktima.
Sa karun nagapadayon pa ang ila hot pursuit operation sa may kahimuan sang krimen, nga ginalantaw isa lamang ka persona.
