Wala sang nabaton nga formal report kag wala sang nagpa-blotter sa Talisay City Police Station angot sa nakahigot nga nylon sa puno kag ginbalabag sa dalan kun sa diin nagtuga sang marka sa liog sang biktima.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, ang insidente ang nakita nalang sang social media kag ini ang nagtuga sang alarma kun sa diin ginpangita sang mga kapulisan ang nag-post kag gin-contact ini.
Suno kay Jocson, ginpadulungan nila ang Efigenio Lizares St kun diin natabo ang insidente kag nagpatigayon sang ocular inspection.
Suno diri, natukiban sang mga kapulisan nga wala sang puno nga nahigtan sang nylon apang ginalantaw sini nga ang nylon ang ginhigot sa burador nga nautod.
Ini bangud ang lugar ang masami nga ginapaluparan sang burador.
Gin-isa isa sang mga imbestigador ang puno sa lugar apang wala sang may nakita nga puno nga nahigtan sang nylon.
Ang motorista ang nakaagom lamang sang marka sa liog sini.
Pahanumdo ni Jocson sa mga magahampang sang burador nga siguruhon nga mahimo ini kag kun nabugto ang higot pangitaon ini agud indi na makatuga sang insidente sa mga nagalabay.
