Padayon pa ang imbestigasyon sang mga otoridad sa gina-alegar nga paghold-up sang isa ka estudyante sa 18th Lacson St, Bacolod City.
Ang estudyante ang graduating kag nakuhaan sang P49,000 nga ibayad pa kuntani sa iya nga tuition.
Sa interview sang Bombo Radyo Bacolod kay Police Major Eugene Tolentino, station commander sang Bacolod City Police Station 2, nagarequest pa sila sang kopya sang CCTV footage kag may ginacontact na sila nga iinterviewhon agud nga kumpirmahon ang ginapahayag nga holdup incident.
Suno kay Tolentino kun may makuha sila nga CCTV footage ipakita nila sa estudyante agud nga makumpirmar kun ang persona nga makita sa footage amo ang nagbutong sa iya samtang nagalakat, kag nagtutok sang kutsilyo sa iya tubtob nga nakuha ang nasambit nga kantidad.
Wala naman sang madamo nga tawo sa lugar sang natabo ang insidente bangud amat amat na nga nagadulom.
Ginahulat pa sang mga kapulisan ang availability sang estudyante agud nga mainterview para sa dugang nga imbestigasyon agud nga matumod ang suspek sa gin-alegar nga holdup incident.
