Magatutok ang kamara sa gina-alegar unexplained wealth kag mga isyu sa Statement of Assets, Liabilities, kag Net Worth (SALN) ni Vice President Sara Duterte sa masunod nga impeachment hearing, kun sa diin gin-request si anay Senator Antonio Trillanes IV nga magtambong kag pila pa ka mga ahensya sang gobyerno.
Suno kay House Committee on Justice Chairperson Gerville Luistro, nagpagwa ang komitiba sang subpoena kay Trillanes agud obligarun ini nga magtambong sa gintalana nga hearing sa Abril 22.
Si Trillanes ang ginakabig nga kabahin sang Saballa et al impeachment complaint, partikular sa topiko nga unexplained wealth sang bise presidente.
Magluwas sa anay senador, ginkumpirmar man ni Luistro nga imbitado ang mga opisyal naggikan sa Anti-Money Laundering Council (AMLC).
Ginalauman man ang pagsumiter sang mga dokumento nga may kaangtanan sa mga bank transactions sang mag-asawa nga nanday Sara kag Manases Carpio.
Kalakip man sa ginalauman nga magatambong sa hearing amo ang mga tiglawas sang Securities and Exchange Commission (SEC), Bureau of Internal Revenue (BIR), kag Office of the Ombudsman.
