Patay ang 51-anyos nga lalaki matapos ginbuno sang tag-iya sang balay nga iya ginsulod kag ginaalegar tuyo kuntani nga kawatan sa Barangay Cabatangan, ciudad sang Talisay, Lunes, alas 12:10 sang kaagahon.
Sa interview sang Bombo Radyo kay Police Staff Master Sergeant Reginaldo Suelto, imbestigador sang Talisay City Police Station, ang biktima kag ginaalegar may tuyo nga magpangawat ang ginkilala kay Ricardo Nasis, 51-anyos samtang ang suspetsado kag tag-iya sang balay amu ang pakaduha sini nga si Leo Diaz, 52-anyos, lunsay mga residente sang nasambit nga lugar.
Suno kay Suelto, pasado alas 12:00 sang kaagahon sang nabugtawan si Diaz nga yara na sa sulod sang iya balay si Nasis kag ini ang nag-agi sa bintana.
Si Nasis ang may dala nga kitchen knife, iya ginhan-usan si Diaz kag sila ang nagpukutay.
Bangud nga dako ang panglawason ni Diaz kag gamay naman si Nasis, wala nasarangan sang biktima ang suspetsado kag ini ang nakaangkon sang pilas sa lawas nga gintunaan sang iya kamatayon.
Wala naman nagpalagyo si Diaz pagkatapos sang insidente kag naabtan sang mga kapulisan sa area.
Posible suno sa imbestigador nga nahibaluan ni Nasis nga nakabaligya sang baboy si Diaz sang tinalikdan nga adlaw rason kun ngaa ginsulod sini ang balay sang suspetsado.
Sa karun suno kay Suelto, nagaistoryahanay pa ang pamilya sang duha kag ginahulat pa ang desisyon sang mga ini.
