Ginsuguran na ang pagpanglimpyo sa abandonado nga building sa 4th Street sa Bacolod City, kun sa diin natigayon man nga napahalin ang tatlo ukon apat ka pamilya nga nagahukmong sa lugar.
Sa interview sang Bombo Radyo Bacolod kay City Administrator Atty Mark Vincent Mayo, madamo na sang nagakahangawa sa lugar bangod ini ang gina-istaran na sang mga “children and family in street situation,” kun sa diin madamo man sang mga illegalidad nga ginabuhat sa lugar, kag hayagan man ang mga nagasuyop sang rugby.
Matapos ang pagpadala sang sulat ni Mayor Greg Gasataya sa tag-iya sang abandonado nga establishimento, gilayon man nga nagreply kahapon ang tag-iya kag kaina ginpangunahan sini ang clearing sa lugar.
Nag-upod man sa operasyon ang anti mendicancy task force sang Department of Social Services and Development (DSSD), City Legal Enforcement Unit, Bacolod Environment and Natural Resources Office (BENRO) kag Bacolod City Police Office.
Kun sa diin naabtan nila ang ginabanta napulo ka indibidwal, kag maathag nga ginahimo na nila nga balay ang lugar bangod sila ang nag-ayo pa nga panghimuson anay ang ila mga pagkabutang.
Tuman naman kadamo sang mga basura nga nahakot sa area, lakip na ang mga plastic kag botelya.
Suno kay Mayo, ang mga nagapuyo sa lugar ang lunsay mga residente sa gwa sang Bacolod City.
Sa mga minors, ang DSSD ang magakoordinar man sa Department of Social Welfare and Development (DSWD) sa ila mga banwa ukon ciudad, apang sa mga adults, nakadepende na sa mga ini kun sa diin sila magakadto.
Ang City Government ang willing man nga mag-assist kun sila ang magapangayo sang bulig sa pagpauli sa ila mga lugar.
Aminado si Mayo nga makahatag na sang risgo kag kahangawa sa mga pumuluyo ang illegal nga mga ginahimo sang mga naga-istar sa lugar, kag bisan ang mga ginatawag “children at risk” ukon mga minors, ang makabig na nga risgo sa komunidad.
Nagpadala naman kaina sang materyales ang representative sang tag-iya sang building, agud matapos sang pagpanglimpyo, ila na nga masemento ang ginbakbak nga pader.
Nahibaluan nga makapila na sadto nga ginsirad-an ang building apang ginaguba lamang gihapon sang mga street dweller ang pader kag sila ang nagasulod, gani sa karun, ini ang butangan na sang 24 oras nga gwardiya.
