Gina-imbestigaran na sang Bacolod City Health Office ang ila mga staff ilabi na ang mga guwardiya matapos nagpalab-ot sang reklamo ang isa ka concerned citizen nga nagpila man sa gwa sang CHO agud nga magpagabot sang unto nga ginabaligya ang number agud nga makatransact sa CHO.
Sa video nga ginpadala sini sa Bombo Radyo Bacolod, makita ang isa ka person with disablity (PWD) sa sulod sang compound sang CHO kag gina-alegar staff, ang nagaduhol sang numero sa isa ka lalaki kabaylo sang 20 pesos kag pila ka mga pisuson.
Suno sa tagreklamo, madugay na sila nga nagapila apang ginahambalan sila nga wala na sang number bangud nga tuman ka damo ang nagpadulong sa CHO agud nga magkuha sang medical certificate, magpa-check up ukon magpagabot sang unto.
Gin-abisuhan ang mga ini nga magbalik na lamang pagka-aga ukon sa hapon.
Apang naghulat-hulat ang amo nga concerned citizen sa paglaom nga mahatagan ini sang numero.
Samtang nagapila, natalupangdan sini ang isa ka PWD nga nagaduhol sang number sa isa ka lalaki kabaylo sang kwarta.
Sa interview sang Bombo Radyo kay City Health Officer Dr. Carmela Gensoli, ginpahayag sini nga iya na ginpaimbestigaran ang ila mga gwardiya nga naghalin sa lain nga agency apang napaidalum gihapon sa gobyerno.
Suno kay Gensoli, wala ini nakahibalo nga may pagbayranay nga nagakatabo sa pagkuha sang numero kag nagapati ini nga indi ini husto.
Suno sa iya, mangita na naman sila sang lain nga stratehiya bangud masami na sila nga naga-ilis-ilis sang style agud wala sang dinayaay nga matabo.
Aminado man ini nga ila mga staff ang nagapanghatag sang mga numero apang kun kaisa suno sa iya, nagakalutsan sila gihapon sang mga gwardiya.
