Ginalantaw sang isa ka miyembro sang House of Representatives nga kaangay sang wala katapusan nga isyu ang nagakatabo sa Philippine Health Insurance Corporation ukon PhilHealth.
Sa interview sang Bombo Radyo Bacolod kay Bayan Muna Partylist Representative Carlos Isagani Zarate, ginpahayag sini nga humalin pa sang nagpungko ini nga congressman sang tuig 2013, madamo na nga anomaliya ang naga-exist sa ahensya kaangay sang bogus claims kag mga issues sa claims sang mga benepisyaryo nga nagpabulong sa masakit sa mata ukon katarata.
Suno kay Zarate, nangin gatasan sang mga corrupt ang ahensya bangud sa dako pa nga pondo ang nabilin kada tuig nagikan sa ginpain nga pondo para diri.
Sang una, halos libre ang pagpaospital apang sa karun bisan ang cotton ang may bayad.
Ginpahayag sini nga antes kuntani magbalay sang isa ka layi ang mga mamalidha, dapat ginsolusyunan anay ang dako nga problema sang PhilHealth.
Kaangay lang sang ginduso ni former congressman kag sa karon presidential spokesperson Harry Roque nga Universal Health Care Act nga indi man kinahanglanon kuntani bangud dugang lang ini nga bug-at para sa mga pumuluyo.
Suno sa kongresista, indi man maggwa ang issue nga may nadula sa pondo kun wala ini sang ginhalinan kaangay lamang sa isyu nga nadula ang masobra P150 billion bangud sa ghost patients.
Wala sang katapusan ang systemic nga korupsyon sa ahensya suno kay Zarate kun wala sang manabat sa mga anomaliya.
Suno kay Zarate, matuod man ukon indi ang nadula nga binilyon nga pondo, dako ini nga kapierdihan sa mga ordinaryo nga pumuluyo nga nagabayad sang mandatory premium.
Ginpahayag man sini nga kuntani ang pondo nga ginahatag sa PhilHealth nga sobra-sobra kada tuig ginhatag nalang sa public hospitals bangud sa karon, ginabuhinan pa ang pondo para diri.
Sa karun, nagalaom si Zarate nga tuod-tuoron sang Ombudsman ang ginapatigayon nga imbestigation sa PhilHealth kag manabat ang mga utok sang korapsyon kag indi ang manubo nga mga opisyales.
