Boluntaryo nga nagsungka sa San Carlos City Police Station ang lalaki nga nakaluthang-patay sa gina-alegar may tinutuyo sa nakutkot sini nga bulawan.
Suno kay P/Maj. Mark Angelo Junco, hepe sang San Carlos City Police Station, ang suspetsado ang ginkilala kay Rodolfo Alvarez, 62 anyos kag isa ka mangunguma nga residente sang Sitio Tal-ot, Barangay Guadalupe, San Carlos City, Negros Occidental.
Santo sa inisyal nga imbestigasyon, ginpahayag nga may nagalapta nga balita sa lugar nga nakakutkot sang gold bars sa idalom sang balay ang suspetsado.
Samtang duwa naman ka persona ang nagatiid sa balay sini sang pila na ka adlaw kag gintan-aw nga luyag kawaton ang nasambit nga bulawan.
Gin-ako naman ni Alvarez nga gintiro sini kag napatay ang wala pa makilala nga persona sang Domingo, Agosto 30, takna alas-10:00 sang gab-i.
Samtang gindakop man ang gina-aligar nga kaupod nga babayi sang biktima nga ginkilala kay Eden Suico, yara sa legal nga edad kag residente sa banwa sang Toboso, Negros Occidental.
Apisar nga nagapanginwala si Suico nga may kaangtanan sa biktima, ginhold ini sang San Carlos City Police Station agud hibaluon kun ngaa yara ini sa lugar apisar nga residente sang lain nga banwa.
Samtang nagpanawagan naman si Junco kun sin-o ang nakakilala sa biktima nga nakasuksok sang blue nga shorts kag itom nga jacket nga makig-angot sa police station.
