Nagadangat sa P108, 800 ang balor sang ginaalegar nga shabu ang nakumpiskar sang katapo sang Silay City Police Station sa magkatuhay nga buybust operations kahapon.
Sa interview sang Bombo Radyo Bacolod kay interview kay Police Maj. Rollie Pondevilla, hepe sang Silay City Police Station, ang una nga operasyon nga ginpatigayon sa Barangay Guinhalaran, Silay City kun sa diin nagdakpan sanday Darius Imperial, 48 anyos kag Perlito Delegero, 31 anyos, lunsay nagapuyo sa Barangay Mambulac, Silay City kag Street Level Target.
Nakompiskar sa paghinakop sang mga ini ang siyam ka gramos sang suspected shabu nga ginabanta nagabalor sang P61, 000; P3,500 buybust money kag isa ka .38 caliber revolver.
Samtang, sa operasyon naman nga ginpatigayon sa Barangay Mambulac, Silay City, arestado naman si Jonathan Figueroa, 46 anyos, residente man sang Barangay Mambulac, Silay City kag ginaalegar tinawo ni Michael Divinagracia nga pinuno sang Divinagracia Drug Group.
Nakuha naman sa paghinakop sini ang pito ka gramos sang suspected shabu nga nagabalor sang P47, 600 kag P3,000 nga buybust money.
Suno pa kay Pondevilla, madugay na nila nga ginasurveillance ang mga suspetsado kag yara man sa drug watchlist sang Silay City Police Station.
Ang mga arestado ang yara na sa paghinakop sang Silay City Police Station kag natalana nga pasakaan sang kaso.
