Nadakpan sa akto sang kapulisan nga ginhaboy sang mag-utod nga gina-alegar miyembro sang Epogon Group ang isa ka panid sang bansil sang sigarilyo nga may unod nga duha ka mga heat-sealed transparent plastic sachet sang suspected shabu samtang gina-usisa ang mga ini sa barangay hall sang Barangay Tuguis sa banwa sang Hinigaran angot sa ila nga identity.
Sa interview sang Bombo Radyo Bacolod kay Police Major James Latayon, hepe sang Hinigaran Municipal Police Station, ginpahayag sini nga mga tatlo pa lang ka semana sa amo nga barangay ang mag-utod nga ginkilala kanday Arman Epogon-Rivera, 23-anyos kag Allen Epogon-Rivera, 19-anyos.
Ginpatawag ang mga ini sa barangay hall agud nga usisaon ang ila nga identity matapos mahibaluan nga may kaangtanan ang mga ini sa Epogon.
Suno kay Latayon, samtang gina-kwestyon ang duha, ginapasuni nga may ginhaboy ang mga ini nga bansil sang sigarilyo nga may unod nga suspetsado shabu.
Nakuhaan pa gid si Allen sang isa ka sachet sang ginapatihan iligal nga druga.
Ginabanta nga nagabug-at sang 0.075 gram ang amo nga shabu kag nagabalor sang P1,500.
Yara karon ang duha sa kustodiya sang Hinigaran Municipal Police Station para sa nagakaigo nga disposisyon.
