Naaresto sang mga katapo sang militar ang isa ka babayi nga katapo sang New People’s Army (NPA) nga residente sang Barangay Araal, La Carlota City, Negros Occidental kahapon, Marso 16 kasunod sang nagluntad nga engkwentro sa Janiuay, Iloilo.
Ini ang nadakop sa operasyon sang mga katapo sang 12th Infantry Battalion sang Philippine Army kasunod sang kapin duha ka minutos nga pagbayluhanay sang lupok samtang nagapatigayon ang mga suldado sang pursuit operation sa Barangay Dabong takna ala-1:20 sang kaagahon kahapon.
Ang arestado nga ginkilala kay alyas Bing, 66 anyos ang katapo sang Sandatahang Yunit Propaganda (SYP) Baloy Platoon sang NPA.
Nadakpan ini nga nagapanago sa isa ka puluy-an sa Dabong Village sang ginbayaan ini sang mga kaupdanan nga nagpalagyo gikan sa lugar.
Matapos sang engkwentro, ang mga tropa sang gobyerno ang nakarecover sang isa ka cal. 45 pistol nga may duha ka magazine, pito ka live ammunition, mga gamit sa paghimo sang anti-personnel landmine kasubong man ang mga subersibo nga mga dokyumento nga may mataas nga intelligence value.
Suno kay Brig. Gen. Marion Sison, commander sang 301st Infantry Brigade, dako ang epekto sang insidente sa recruitment kag extortion activities sang NPA bangod sa nakuha nga mga materyales nga may high-intelligence value.
Ginpakigbahin man sini nga nagaplano ang communist-terrorist group nga magpang-atake sang mga patrol base, security forces kasubong man ang pagsabotahe sa mga proyekto sang gobyerno sa lugar.
Paathag sini nga ang pagkakumpiskar sa mga pagkabutang nga ginakinahanglan sa pagplastar sang ila nga plano kaangay sang gamit sa paghuman sang anti-personnel landmine kag ang electric wire ang pamatuod nga may tinutuyo nga magtanom sang kahadlok ang mga NPA.
