Igatugyan na lamang sang alkalde sang ciudad sa Bacolod City Police Office ang imbistigasyon sa nagluntad nga insidente sa Bacolod Traffic Authority Office sa tunga nanday Bacolod City Councilor Al Victor Espino kag BTAO personnel nga si Abner Salvallon.
Sang Miyerkules, gin-impound sang BTAO ang motorsiklo sang duha ka estudyante bangod nga wala sila sang mga helmet kag drivers license.
Sa bahin sang tag-iya sang motorsiklo nagbayad ini sang kapin P1,500 sa isa ka BTAO personnel para sa penalty kag ila na nakuha ang motorsiklo.
Apang, sila ginpabalik sa opisina nga ila kuno ginkuha ang motorsiklo apisar nga wala sila nakabayad.
Nakig-angot ang tiyo sang estudyante kay Espino bangod sila ang madugay naman nga mag-abyan kag amo na nga nagsulong si Espino sa BTAO.
Suno kay Espino wala ini nanamian sa ginhimo nga pagkapyot sa iya sang BTAO personnel nga si Salvallon amo nga nagbuya ini sang indi manami nga tinaga.
Samtang, sa bahin naman ni Salvallon siya ang ginpahog ni Espino nga nakita pa sini nga may armas-luthang nga nakasukbit sa iya hawak, amo nga ginpablotter ni Salvallon si Espino.
Apang, ginpanginwala naman ni Espino nga siya may bitbit nga armas-luthang bangod bilang isa ka mamalidha nakahibalo ini nga may yara sang ginapatuman nga COMELEC gunban kasubong man nga nagapanindugan ini nga ang rason kun ngaa siya nagpadulong sa BTAO ang bangod sa korapsyon kag pagpangilkil nga nagakatabo.
Naglab-ot sa opisina ni Bacolod City Mayor Alfredo Bneitez ang blotter report kay Espino kag suno sa alkalde, igatugyan sini ang imbestigasyon sa BCPO para mahibaluan ang matuod-tuod nga natabo.
Suno kay Benitez, igapasa man sa iya nga opisina ang mga report sa imbestigasyon kag kun sin-o man ang mapamatud-an nga may sala, ang magapangatubang sa konsekwensya.
Dugang pa sini, indi sini pag-itolerar ang korapsyon kag kapabayaan sa propesyon.
