Gina-imbestigaran na sang Bacolod City Police Office (BCPO) ang gina-alegar printing press nga ginkadtuan sang pila ka mga pumuluyo agud magpahimo sang Home Quarantine Pass (HQP).
Madumduman nga nakabaton sang reklamo si Bacolod City Mayor Evelio “Bing” Leonardia nga may yara sang mga persona nga nagapalapit sa mga printing press nga ginkuha sang ciudad agud nga mag-imprinta sang HQP kag naga-ayo nga personal nga himuan ang mga ini.
Gilayon nga ginmanduan sang alkalde si BCPO director P/Col. Henry Biñas nga imbestigaran ang amo nga isyu.
Sa interview sang Bombo Radyo Bacolod kay Biñas, ginkumpirmar sini nga nagpakadto na siya sang imbestigador sa Bacolod Government Center agud magpangayo sang sample sang HQP nga napanagtag sa ciudad.
Suno kay Biñas, gina-imbestigaran na sini ang printing press nga ginatumod sang alkalde.
Dugang pa sini nga samtang wala pa sang may nagalagaw nga peke nga HQP, mas maayo nga matapna ini dayon.
Plano naman sini nga magpangayo sang masterlist sang mga pangalan nga nahatagan sang HQP sa tagsa ka barangay agud nga may tamdan ang mga pulis sa mga check-up points kun otorisado ang isa ka persona nga maggwa sa iya balay ukon indi.
Nagahingyo ang city director sa mga pumuluyo nga kuntani magsunod nalang sa ginapatuman nga pagsulundan.
Nahibaluan nga ang HQP policy ang nagsugod patuman kahapon kag magatapos sa Setyembre 19.
Ang mga HQP holders nga ang HQP ang nagatapos sa odd numbers (1,3,5,7 kag 9) ang sarang makagwa kun Lunes, Miyerkules kag Biyernes samtang ang mga HQP holders nga ang HQP ang nagatapos sa even numbers (0,2,4,6 kag 8) ang pwede naman makagwa kun Martes, Huwebes kag Sabado.
“No movement” naman kada Domingo nga adlaw tubtob sa Setyembre 13.
